Flashkerala
ഇൻഷുറൻസ് റെഗുലേറ്ററി ആൻഡ് ഡെവലപ്‌മെന്റ് അതോറിറ്റി ഓഫ് ഇന്ത്യയുടെ (ഐആർഡിഎഐ) ശുപാർശകളെത്തുടർന്ന്, മോട്ടോർ തേർഡ് പാർട്ടി (ടിപി) ഇൻഷുറൻസ് പ്രീമിയങ്ങള്‍ വർദ്ധിപ്പിക്കുന്നതിനുള്ള നിർദ്ദേശം റോഡ് ഗതാഗത, ഹൈവേ മന്ത്രാലയം (എംഒആർടിഎച്ച്‌) പരിഗണിക്കുന്നുണ്ടെന്നാണ് റിപ്പോർട്ടുകള്‍. തേർഡ് പാർട്ടി ഇൻഷുറൻസ് പ്രീമിയത്തില്‍ ഐആർഡിഎഐ ശരാശരി 18 ശതമാനം വർദ്ധനവ് നിർദ്ദേശിച്ചിട്ടുണ്ട് എന്നും ചില വിഭാഗത്തിലുള്ള വാഹനങ്ങളില്‍ ഈ വർദ്ധനവ് 20 മുതല്‍ 25 ശതമാനം വരെയാകാം എന്നും റിപ്പോർട്ടുകള്‍ പറയുന്നു.
എന്താണ് തേർഡ് പാർട്ടി ഇൻഷുറൻസ് ?
രാജ്യത്തെ മോട്ടോർ വാഹന നിയമപ്രകാരം ഒരു വാഹനത്തിന് തേർഡ് പാർട്ടി ഇൻഷുറൻസ് നിർബന്ധമാണ്. നിങ്ങളുടെ വാഹനം മൂന്നാമതൊരാള്‍ക്ക് ജീവനോ സ്വത്തിനോ നഷ്ടം വരുത്തുന്ന സാഹചര്യത്തില്‍ ഈ ഇൻഷുറൻസ് ഉപയോഗപ്രദമാകും. നിങ്ങള്‍ക്ക് മാത്രമല്ല, നിങ്ങളുടെ വാഹനം മൂലം മറ്റൊരാള്‍ക്ക് സംഭവിക്കുന്ന നഷ്‍ടങ്ങള്‍ ഈ ഇൻഷുറൻസ് പരിരക്ഷിക്കുന്നു.
എന്തുകൊണ്ടാണ് ഇപ്പോള്‍ വില വർധനവ്?
തേർഡ് പാർട്ടി ഇൻഷുറൻസില്‍ ഇൻഷുറൻസ് കമ്ബനികള്‍ വലിയ നഷ്ടം നേരിടുന്നതായാണ് റിപ്പോർട്ടുകള്‍. 2025 സാമ്ബത്തിക വർഷത്തില്‍, സർക്കാർ കമ്ബനിയായ ന്യൂ ഇന്ത്യ അഷ്വറൻസിന്‍റെ തേർഡ് പാർട്ടി (ടിപി) നഷ്‍ട അനുപാതം 108 ശതമാനം ആയിരുന്നു. അതായത്, ലഭിച്ച പ്രീമിയത്തേക്കാള്‍ കൂടുതല്‍ ക്ലെയിമുകള്‍ നല്‍കേണ്ടിവന്നു. ഗോ ഡിജിറ്റ്, ഐസിഐസിഐ ലോംബാർഡ് തുടങ്ങിയ സ്വകാര്യ കമ്ബനികളും യഥാക്രമം 69 ശതമാനവും 64.2 ശതമാനവും നഷ്‍ട അനുപാതങ്ങള്‍ റിപ്പോർട്ട് ചെയ്തിട്ടുണ്ട്. ഇക്കാരണത്താല്‍, ഇൻഷുറൻസ് കമ്ബനികളുടെ സാമ്ബത്തിക സ്ഥിതി സന്തുലിതമാക്കുന്നതിന് പ്രീമിയം വർദ്ധിപ്പിക്കേണ്ടത് ഇപ്പോള്‍ അത്യാവശ്യമാണെന്ന് ഐആർഡിഎഐ കരുതുന്നു.
അവസാനം പ്രീമിയം വർദ്ധിപ്പിച്ചത് നാല് വർഷം മുമ്ബ്
കഴിഞ്ഞ നാല് വർഷമായി തേർഡ് പാർട്ടി പ്രീമിയത്തില്‍ വർധനവുകളൊന്നും ഉണ്ടായിട്ടില്ല. 2021 ലാണ് അവസാനമായി പ്രീമിയം നിരക്കുകള്‍ വർദ്ധിപ്പിച്ചത്. എന്നാല്‍ അതിനുശേഷം, പണപ്പെരുപ്പം, ചികിത്സാ ചെലവുകള്‍, കോടതി തീരുമാനിച്ച നഷ്‍ടപരിഹാരം, റോഡുകളിലെ വർദ്ധിച്ചുവരുന്ന ഗതാഗതം എന്നിവ കാരണം തുടർച്ചയായി നഷ്ടം നേരിടുന്നു എന്നാണ് ഇൻഷുറൻസ് കമ്ബനികള്‍ പറയുന്നത്.
എപ്പോള്‍ നടപ്പിലാകും? എന്തായിരിക്കും ഫലം?
അടുത്ത രണ്ടുമുതല്‍ മൂന്ന് ആഴ്ചകള്‍ക്കുള്ളില്‍ ഇക്കാര്യത്തില്‍ അന്തിമ തീരുമാനം പ്രതീക്ഷിക്കുന്നു. അതിനുശേഷം സ്റ്റാൻഡേർഡ് റെഗുലേറ്ററി പ്രാക്ടീസ് അനുസരിച്ച്‌ പൊതുജനാഭിപ്രായത്തിനായി കരട് വിജ്ഞാപനം പുറപ്പെടുവിക്കും എന്നാണ് റിപ്പോർട്ടുകള്‍.
തേർഡ് പാർട്ടി പ്രീമിയത്തില്‍ 20 ശതമാനം വർദ്ധനവ് ഉണ്ടായാല്‍, ഇൻഷുറൻസ് വ്യവസായത്തിന്റെ അണ്ടർറൈറ്റിംഗ് മാർജിൻ അതായത് ലാഭം നാല് മുതല്‍ അഞ്ച് ശതമാനം വരെ മെച്ചപ്പെടുമെന്ന് വിദഗ്ദ്ധർ വിശ്വസിക്കുന്നു. വാണിജ്യ വാഹന ഉടമകളെ സംബന്ധിച്ചിടത്തോളം ഈ വർദ്ധനവ് ബജറ്റിനെ കൂടുതല്‍ ബാധിച്ചേക്കാം. നിങ്ങളുടെ വാഹനത്തിന്റെ തേർഡ് പാർട്ടി ഇൻഷുറൻസ് പോളിസി പുതുക്കാൻ പോകുകയാണെങ്കില്‍, നിങ്ങള്‍ പുതിയതും ചെലവേറിയതുമായ നിരക്കുകള്‍ നല്‍കേണ്ടി വന്നേക്കാം. സാധ്യമായ വർദ്ധനവ് ഒഴിവാക്കാൻ നിങ്ങളുടെ പോളിസി ഇപ്പോള്‍ തന്നെ പുതുക്കുന്നതാണ് നല്ലത്.
